好感激呢位follower主動dm我話可以分享一啲關於加拿大college🇨🇦嘅入學心得，有意去加拿大升學嘅就要留意啦🔥！
關於College嘅基本資料
入college嘅人大部分都想transfer U，而唔同大學係會要求你修唔同嘅associate/diploma degree，所以你必須根據學校建議你揀嘅degree然後跟番佢提供嘅建議揀科表進行選科！例如好似我係想轉入UBC Sauder，學校就會建議我揀diploma of arts and science (commerce)，然後跟番揀科表揀科就可以架啦~
你可以選擇transfer to year 2 or year 3，視乎college year 1/ year 2嘅成績作決定，不過普遍嚟講大家都會想transfer去year 2，所以競爭會好大，收生嘅要求都會比較高。聽聞UBC Sauder transfer to year 2 拎GPA 3.9-4.0先叫穩入。Transfer Year 3通常都比trans year 2容易少少。
根據UBC Sauder transfer guide，假如同學想 transfer year 2嘅話，2個sem夾埋要讀最少24 credits (即係8個courses)，都幾chur架～ 所以如果覺得自己搞唔掂嘅話都建議transfer to year 3。喺到提番，2年內一定要讀到60 credits！其實30 credits係for major，另外30可以揀一啲自己鍾意嘅嘢，例如心理學、日文、computer science、marketing等等，所以自由度都幾大。
報名資訊
College嘅話佢每一個省份都有一個報名系統。通常喺學校官網都可以搵到報名方法，所以唔使太擔心跟返指示就得，通常填番啲資料然後交報名費就可以。同埋其實大多數college有錢就收，所以好適合一啲想重新開始嘅同學仔。
開學通常係1月同9月居多，有啲都會喺5月開學，大約預半年至一年時間去準備報名啲嘢就可以。
需唔需要搵agent？
我由揀學校整簽證，全部自己一個搞掂冇人幫過我哈哈。我覺得真係要睇自己嘅capability。但係其實搵中介又唔係壞事嘅，始終學校真係乜都唔講。我去到八月先知道我要考嗰啲英文數學考試先reg到某啲科，有啲有prerequisites。如果一早搵中介嘅話，你就會應該會更加清楚啲程序/細節。
入學成績要求
College大部分都冇咩要求。我嗰間Langara College要求DSE主科全2同IELTS 6.5。
學費
每一間學費都唔同，不過大概都係一年100-120k。同埋要視乎你一年讀幾多科，如果一年24 credits就大約10萬。
適合咩人讀？
假如覺得自己直入唔到大學，冇咁多錢負擔大學學費，英文唔係好好，而且想重新開始，college係一個好好嘅選擇。
Trans U成績要求
Arts要求最低，GPA 3.5以下都轉到。但商科就偏高，SFU都好似要3.3-3.5，而UBC就更加唔使講啦～ 所以讀得college而又想入番啲比較出名同埋好嘅大學，一係就完全all in讀書拎高GPA，一係豐富自己嘅personal profile，咁先有機會成功！
不過其實唔使咁驚嘅，都好睇你想讀啲咩大學。如果唔係aim high，想讀下例如SFU嗰啲，即係冇UBC咁勁嘅大學，要求就冇咁高。
順帶一提，如果要trans嘅話，每一間學校都唔同嘅timeline到唔同。UBC好似1月就截止，所以第一個sem嘅成績都幾重要。
有心Trans一間好嘅U，應該讀野雞學校定入college？
如果唔想入college嘅話，都可以揀入一啲野雞大學，佢哋都可以trans u。而野雞大學畀分反而好似會鬆少少，啲老師好似冇咁手緊。不過，就真係要睇吓你想要乜嘢師資質素或者學校資源～
某啲college喺唔同城市都會有啲名氣㗎嘛，咁我諗其實啲大學都想揀啲有質素嘅學生嘅。我覺得佢哋會寧願揀一啲真係讀到書嘅學生～
心態調整嘅重要性
其實college同香港asso基本上係差唔多，只係外國嗰邊嘅人唔會介意讀college，因為好普遍，唔會好似香港咁將大學同asso分開到咁有階級觀念。College其實十分chur，你入得就預咗唔可以hea，因為大家都想轉番入去好嘅大學，競爭一定係有嘅，唯一可以做嘅就係畀心機啲讀書，有問題嘅話多啲問吓身邊嘅朋友同學仔，又或者問prof，又或者參加吓一啲學校舉辦嘅peer learning programme，等人去幫你。入到去真係好多嘢都唔清唔楚，唔好太expect學校乜野都會話你聽，佢哋真係乜都唔會話你聽。唯一可以做嘅係係自己睇清楚校網，做多啲資料蒐集。
College必用網站
一定係每一個省份自己有嘅transfer guide (e.g. BC省就係bctransferguide)，一定要睇吓你係college揀嘅courses同你想transfer嘅大學有冇得將credit對等，有時候可能要喺college到讀6個credits先等於大學嘅3個credits架~所以一定要睇得清清楚楚，唔可以出錯！
另一個網站一定係ratemyprofessor。喺college返咗一個月學，真心明白到professor質素嘅重要性，我有2個course都reg到好唔掂嘅professor，有機會連累到個GPA架。reg科之前一定要做好資料蒐集，睇吓佢教得好唔好或者畀分嚴唔嚴。