寫明心態決定境界，今次我就想講有關於比較心態嘅野畀大家參考一下😜唔一定人人啱用，但都可以睇吓先呢😌💩
1. 唔好盲目同其他人比較
大家都成日聽「人比人，比死人」，經歷咗呢6年嘅中學生涯之後，我覺得呢一句話真係好true💩
可能大家覺得同人比較冇咩野呀，但其實又係咪真係冇咩野？如果你高分過人，你同人比較，自然就會有優越感，覺得自己好勁，唔需要再進步。但如果你低分過人，你又會覺得自己好差，傷害到自己嘅自尊。咁睇法，其實兩方面都對自己毫無益處。努力讀書唔應該係為咗超越人地，而係應該為咗自己而努力啊！我並唔係想站喺道德高地同大家講呢番話，但你諗諗，當你入到大學嘅時候，你就會見到更加多精英中嘅精英，明白到「一山還有一山高」，咁若然你仲係不斷同人比較嘅話，你覺得你仲會有向上游嘅動力嗎？呢個問題值得大家深思哈哈～
2. 嘗試考試時唔好咁緊張
老老實實，識我嘅人都知我考試嘅時候壓力會勁大，勁緊張😂 雖然我係真係好緊張，但我都會搵辦法令自己考試前冇咁緊張。其中一個方法係你考試之前預留充足嘅時間溫書，千其唔好臨急抱佛腳，等自己可以溫到滾瓜爛熟，加強自己應試嘅信心。如果針對DSE黎講，我有幾個建議。第一，選擇適合自己嘅考場。意思即係你揀你喺你學校果區去考(有機會番自己學校考)定係揀喺你自己居住嘅地區黎考。我係果type喺學校考試會好緊張嘅人，因為d識自己嘅老師會行黎行去，令我超級不安，所以當時我揀番喺自己居住果區考啦。第二，就係早少少起身同提早到考場。睡眠充足固然重要，但提早少少起身可以畀自己作最後準備同清醒一吓頭腦，等自己冇咁insecure😂 早d到考場都可以令自己個心定d呢～
3. 適量咁有feelings of inadequacy
我地要時刻提醒自己喺知識總會有d"不足"。咁樣嘅話我地就會意識到自己要更努力咁學習、涉獵更加多嘅知識去彌補自己嘅不足，做到將勤補拙🤣 我自己覺得呢種心態令我有好大嘅動力繼續堅持，繼續進步，push倒我做到自己嘅最好！
今次講到呢到啦～ 有好嘅心裡質素真係可以贏人幾條街架！所以都唔好忽略擁有一個良好心態嘅重要性呀！