想去英國留學但有所卻步?一文解答你嘅疑慮!⁣| 難識朋友?歧視問題?

⁣之前收到啲dm話自己糾結緊應該喺香港🇭🇰定英國🇬🇧到讀書,亦有啲人喺story啲Q & A到講咗自己嘅顧慮。咁啱@kongirlinuk都想我分享吓呢啲嘢 (想睇更多英國生活分享嘅記住fol佢!)❤️ 今次就為大家解答一下!⁣⁣

⁣⁣

1⃣️ 係咪好難識到朋友?⁣⁣

我自己係一個比較內向嘅人嚟嘅,雖然係咁,識朋友都冇咩問題嘅。初頭開學嘅時候你真係要勇敢啲周圍同人講吓嘢,介紹吓自己同埋搵啲共同話題嚟傾。我明白你地會好緊張,但其實對方可能都係咁,只要你踏出第一步就可以!不過我同意係難啲同到啲朋友熟嘅,因為就算讀同一個degree,大家都可能揀咗唔同嘅modules嚟讀。所以如果你有心同一個人熟絡嘅話,就自己主動啲約對方出嚟食吓飯/一齊下廚/chat吓啦~ 咁樣會容易firm到!⁣⁣

⁣⁣

至於大家可能比較關心同外國人 (非亞洲人) 會唔會難睇做到朋友,我就覺得好睇你嘅性格同佢地夾唔夾。好多外國人都係比較外向、鍾意去clubbing/party/飲酒。如果你唔係呢type人都好難同佢地做到真心朋友,要勉強去做呢啲嘢埋堆其實都冇意義。同埋大家文化背景比較唔同都係難啲做到真心朋友嘅一個原因。不過唔喺個個外國人都咁外向嘅,有啲都內向啲,冇咁鍾意出去蒲。咁我自己就冇勉強同任何人做朋友,覺得夾嘅 (價值觀/性格/目標) 咪多啲一齊,覺得唔夾嘅咪當係普通同學,間唔中傾一兩句。⁣⁣

⁣⁣

想擴大自己個社交圈子都可以嘗試上莊 (個人建議入啲正經啲soc,因為真係獲益良多),咁樣你會容易啲認識到一啲好有ambition/聰明嘅人,我喺我個president身上都學咗唔少嘢。有咗呢啲connections之後,都有機會可以增加自己喺career方面嘅機遇。⁣⁣

⁣⁣

另外,其實識朋友難唔難呢個問題唔係淨係存在喺英國到,你喺香港讀書都可能會有同樣嘅問題。總之社交呢睇嘢真係好講自己夠唔夠主動同埋緣分哈哈!同埋呢,朋友真係唔使多,有兩個知心嘅就已經好好!⁣⁣

2⃣️ 歧視問題嚴唔嚴重?⁣⁣

我去咗咁耐都好少遇到一啲好嚴重嘅歧視,但無可厚非英國疫情初初爆發嘅時候就開始多咗人歧視亞洲面孔嘅人。例如你出街帶口罩,就會有啲人用好奇異嘅眼光望住你,因為佢啲自細受嘅教育就係覺得要好病先要帶口罩。我識個auntie佢之前帶個仔去醫院睇醫生,因為當時疫情都爆發緊,佢地都有帶住口罩,但結果醫院啲人鬧佢地、叫佢地唔好帶...我只可以講英國唔係人人都係咁嘅,有啲人都好友善嘅,上次去餐廳食飯個侍應讚我嘅粉紅色口罩好靚😂 歧視呢啲問題其實好多地方都有,我地都好難搵辦法避免到,唯有做好自己嘅本分、調節好自己嘅心態同埋儘量入鄉隨俗啦。⁣⁣