今次想繼續解答埋大家其他嘅疑慮先～ 希望可以幫到大家做去唔去英國留學呢個重大嘅決定！
1英文係咪要好叻？英文差可以點？
去得英國讀書嘅，英文應該點都有番咁上下，因為你IELTS都要達到某個分數(通常最低要求係overall 6.5，每個component唔低過6.0。但每間大學嘅要求都稍有不同，亦有可能可以用其他成績嚟代替) 間大學先會取錄你。但我明白大家可能擔心自己英文唔夠好會唔會上堂聽唔明/同人地溝通得冇咁好/俾人笑。咁其實你去到英國就會完全浸淫喺一個充滿英文嘅環境，日日係咁講、係咁寫、係咁聽。久而久之，你嘅英文就會變好～ 所以冇需要過分擔心呢一點。
至於有人會擔心聽唔明啲lecturers個英文accent，我就冇乜遇過呢個問題。啲lecturers除咗有英國本土嘅人之外，亦有嚟自其他國家嘅 (e.g. 加拿大、西班牙)，佢地啲accent都係正常你會聽得明嗰啲 (我有一個lecturer係蘇格蘭人，但啲accent都好正常)。加上有ppt上面嘅文字同埋啲lecture recordings嘅輔助，就算你唔係幾聽得明都可以番屋企慢慢重溫。
係咪好難適應當地咁文化同生活習慣？
咁要睇番你個人本身嘅適應能力啦～ 不過我覺得嚟到英國最難適應嘅除咗有佢啲食物之外 (一開始試得多伏所以覺得啲嘢好難食，但耐咗搵到啲好味嘅餐廳就ok嘅)，就係佢地比香港慢嘅節奏。可能因為我習慣咗喺香港啲人做嘢好efficient，所以一開頭去到英國嘅時候我就好難接受佢嗰邊比較低嘅efficiency。例如我有啲朋友去銀行搞手續，都搞咗佢地好耐，因為佢地嘅工作效率真係比較低。不過呢種所謂「慢活」嘅態度我慢慢都適應咗，同埋好似個人少咗壓力咁😂
感情生活如何？好多靚仔？！
唔知點解好多人問呢樣嘢😂 簡單喺到回應吓～ 只可以講大家唔好ff成個大學campus都充滿住外國靚仔🤭 靚仔係有嘅，但人靚但性格唔好嘅都大有人在🤨 呢啲嘢都係隨緣啦🙏🏻～ Geogaholic私心鍾意香港男仔多啲🤭