想做比較本地vs外國升學呢類post好耐，多謝 @learning_elephant 促成今次嘅合作，同埋多謝 @baetutorr 幫手分享本地升學嘅心得✨！ 希望呢個post可以幫到大家做升學決定啦🔥！無論係去定留都有好多因素要考慮㗎！
點解你會揀本地升學？(@baetutorr)
因為本身我係band 2頭中學到讀嘅，本身自己學校同身邊嘅同學都主要係講關於本地升學嘅嘢，而我屋企亦唔係特別富裕，所以嗰陣完全冇想去外國升學嘅諗法。
再加上當時香港政局同社會狀況都未去到好似而家咁差，所以都仲係覺得係香港本地升學同工作係仲有希望。而且揀social science嗰陣，目標都係想做local school嘅老師，所以更加冇想去外國升學嘅諗法，好自然地就揀咗本地升學。
點解我會揀海外升學？
主要係因為我想讀human geog，而又覺得英國可以讀得專啲同埋佢地嘅資源投放都多啲。佢地field trip去嘅地方亦好吸引。以我UCL嚟講，我地可以去Barcelona、Gibraltar同Scotland等等，對於鍾意geog嘅你一定會好enjoy！
另外，就係因為我唔係咁鍾意香港嘅教育，想嘗試一下外國嘅教育方式係點～ 我覺得外國真係好鼓勵你思考、問問題同埋同其他人(同學/教授)互相交流，呢一種風氣我自己幾鍾意，亦覺得學到嘅嘢會係更多。
本地升學 vs 海外升學
費用
本地升學：學費有政府補助 + hall fee平
UGC-funded嘅大學都係有政府補助，大概四萬幾一年。
Hall fee方面亦都係比較平。之前去荷蘭exchange嗰陣，hall fee大概係四千幾蚊一個月，但HKU都係千八蚊一個月左右。
海外升學：學費 + hall fee貴
英國一年學費大約係港幣21-26萬不等，而去美國升學會仲貴，一年可以係大約50幾萬。如果屋企負擔唔到就要靠獎學金/半工讀。但如果屋企負擔到嘅，我覺得呢個絕對係一個長線投資。
至於hall fee，我之前喺英國倫敦住dorm需要大約1萬港幣一個月。
課程年期
本地升學：大部分課程都係讀4年
海外升學：大部分課程只需要讀3年
英國undergrad只需要讀3年，讀埋master都只係需要多1年。換言之，用4年時間就可以擁有比香港同學更高嘅學歷。
課程特點
本地升學：彈性選修模式
課程比較flexible，可以take major/ minor。
海外升學：專科專讀
其實呢個有好有唔好。以我geog為例，每一年只可以take一個非geog嘅module，所以你真係完全會浸淫咗喺geog嘅世界到。而且英國大部分大學都冇common core呢樣嘢。唔好嘅地方係唔夠flexible，冇得take major/minor。
學術氣氛
本地升學：而家香港個情況喺教育上都有一定影響。近一年我喺學校做啲essay/ research paper嗰陣，都明顯feel到professor/ tutor對政治有關嘅議題係特別小心。有啲course係更加為咗避免惹上官非而決定刪除某啲topic。
海外升學：我覺得外國比起香港嘅學術自由度更大，好多話題都開放討論，大家亦比較少會避忌。我地嘅教學模式方面除咗有lectures之外，通常都會有seminars/class同tutorials，而呢兩樣都好鼓勵大家討論。
學習環境
本地升學：好多內地學生
內地生非常之多，我哋唔難係campus入面搵到佢哋嘅蹤影。Master甚至可以一班得1%係local。
海外升學：國際生比例高
入得去外國頂尖學府嘅個個都係學霸，而且好多都係嚟自唔同國家，所以你就可以認識多啲人！呢個對於職場嚟講都係一大優勢，因為你識得喺一個multicultural environment到同人工作/ 相處。同埋你喺一個新環境到讀書同生活都可以更加認識一個地方嘅文化～
認受性
本地升學：容易銜接其他外國大學/ 移民
本地大學喺國際間有高認受性 e.g., HKU, UST, CU等。而家有好多國家嘅移民政策 (例如荷蘭) 為咗吸引high-skilled labour，會講明讀香港幾間排名較前嘅大學學生可以拎working visa到當地做嘢，再住滿特定時間拎居留權。
海外升學：喺外國/香港都有一定認受性
尤其是一啲外國出名嘅大學喺香港/其他國家嘅職場都會有一定嘅認受性，有機會可以幫你提升你嘅競爭力。
就業
本地升學：本地就業前景不明朗
本地升學嘅話，大家好多都會揀番本地就業，但而家嘅情況比較不明朗，將來就業上好大機會會遇到激烈競爭。就業環境上亦唔會再好似以前咁國際化。
海外升學：比較著重當地嘅就業機會
其實呢個都係正常嘅，你去邊到讀書，嗰到嘅career support就會專注喺嗰個地方到。所以如果你想喺外國就業，呢個就會幫到你。如果你想返香港就業，就要靠自己多啲。
其他
海外升學：個人成長
去外國留學係一個令自己真正獨立嘅過程，因為生活嘅大小事都要自己處理。除咗令自己更獨立之外，我覺得亦可以磨練自己，令自己更堅強。
俾考慮緊出國定本地升學同學嘅貼士？ (@baetutorr)
我自己個人係建議大家有資源嘅話，就去海外升學。因為長遠香港前景真係好唔明朗。雖然去外國需要踏出comfort zone，亦一定會有好多嘢好難適應。但我覺得為咗自己未來，及早離開香港係好事嚟嘅。
之前去荷蘭exchange嗰陣，作為一個英文並唔係好好嘅人，都好順利同開心咁渡過咗4個月。雖然會有啲homesick，但整體個生活水平真係好過香港。嗰度嘅生活好peaceful，成個人都可以好放鬆。如果自己煮嘅話，啲食材平過香港得嚟又新鮮過香港好多。唯一唔好係個度冇香港咁多嘢食同咁方便，但so far都幾唔錯，並非大家諗得咁恐怖。
俾考慮緊出國定本地升學同學嘅貼士？ (@geoagholic)
綜合晒咁多因素，我覺得如果有錢有資源嘅選擇海外升學會係一個明智嘅決定。但當中亦要考慮到如果你想返嚟香港執業，有啲科都要再考試 (e.g. 由2022學年起，喺英國讀archi嘅學生返香港考牌需要先通過「學術資格測試」 (AQA) )，而有啲試都唔係容易。
如果屋企經濟有困難，建議申請HKSES獎學金 (F5可以開始考慮，但要預咗係比較competitive)。如果覺得英國/美國升學太貴，可以考慮其他國家，例如係法國。同埋好似佢所講，可以masters先再出國讀，但其實學費都唔平㗎，比undergrad一年更貴。
如果唔想靠DSE去外國升學嘅，可以考慮吓 (1) F4之後轉去其他香港國際學校(e.g., 李寶椿)到讀IB，(2) 入讀英國嘅boarding school (考A levels)同埋(3) 讀foundation升大學。
同埋我想講其實外國讀書完全唔hea㗎，如果你去外國讀書係為咗hea，咁你真係就諗太多啦。我地上堂嘅時數可能唔係好多，但需要自己用課餘時間睇readings、prep seminar等等。好似我geog咁，我地都有好多必讀readings (聽講HKU geog嘅readings都係比較supplementary)。另外，英國呢邊偏向會有多啲英國/歐洲/美國嘅case studies，所以對於我地呢啲香港學生嚟講都需要少少時間去pick up，但其實好多國際學生都同我地一樣，所以都唔需要咁擔心～