好開心大家都覺得上次嘅建議好有用🤩，今次繼續講多啲先～
上次我叫大家唔使咁急住補習，咁如果做pp嘅時候有嘢唔識可以點？除咗問日校老師，我會建議大家買本Joint-Us Solution。雖然呢本書入面嘅解釋都有少少參差，但如果你唔明點解pp個答案係咁，你至少都可以大概咁知道背後個原因。
唔好過分著緊校內試嘅成績。校內試嘅成績未必可以作準㗎！份卷可以出得比DSE淺或者比DSE深，亦可以完全唔DSE-oriented，所以唔能夠完全反映到你嘅實力。其實校內試最大嘅takeaway係你知道你邊part溫得唔夠好/熟，有咩嘢題型仲未識tackle同埋有咩嘢可以再改善，等你可以更好咁為DSE準備。
帶腦上堂！老師唔係神，佢都有教錯嘢嘅時候。如果你上堂淨係不停咁接收啲知識，又唔消化吓佢地，分分鐘自己學錯嘢都唔知～ 要求證，可以同朋友討論吓先或者請教Google大神。
認清自己適合嘅溫習模式。唔好為咗迎合你身邊嘅朋友而選擇咗一啲唔適合自己嘅溫書方法。有啲人可能覺得同朋友溫書有人監督住自己比較有用，但亦有人會覺得咁樣會令自己分心，最後變成同朋友傾偈～ 另外，唔好為咗打卡就夾硬逼自己花大量時間將啲筆記整得超靚。其實啲筆記都係畀自己睇番，只要方便到自己溫書就ok啦！啲筆記整得靚啲唔代表自己溫得好啲㗎！
唔好亂報mock。先唔好講有啲卷完全出同改得離地，我發覺好多人根本連書都未溫好就去裸考坊間嘅mock，咁樣同浪費時間同金錢冇分別，而出嚟嘅成績變相都失去咗參考意義。如果自己認真諗過，真係覺得自己某科有呢個需要，想搵一個機會實戰，咁先去報一兩個口碑比較好嘅嚟試吓啦！
唔好羨慕人地成績好。你地口中嘅「學霸」可能都喺背後默默付出咗好多先會有咁好嘅成績～ 與其羨慕人地，不如做好自己、set好目標，推動自己更加努力！
唔好得罪老師。無論係SBA定係你嘅predicted grades，都會係你嘅老師幫手評分。雖則話呢啲嘢會公平公正咁進行，但我相信如果你得罪個老師應該或多或少都會反映喺你個分數上面。
總之，凡事留一線，日後好相見啦～ 唔好因為一時意氣用事而同分數作對！
唔好成日捱夜。呢個都同你自己嘅時間分配同自律程度有關～ 捱夜唔單止會令自己免疫力下降，仲會令你第二日上堂嘅時候無法集中，完全係一個惡性循環，長遠嚟講對學習成效冇好處。