好開心今次 @kosmic.io 搵我同大家再分享吓啲英國升學心得❤️ 希望可以幫到大家同埋增加你地入讀心儀嘅英國大學嘅機會👩🎓 另外，@kosmic.io 有好多網上直播嘅教學影片㗎，有啲仲要係免費嘅，有興趣記住去睇睇🔥！
1⃣ 及早規劃同準備
‘Nothing worth having comes easy’. 想過去英國嘅名牌大學到讀書並唔係一朝一夕嘅事，而係需要你及早計劃好㗎！咁我自己就係F4尾嘅時候就已經同父母傾好咗我想去英國讀書嘅。好多時候我覺得父母如果經濟許可嘅話，好多都會支持你去英國留學嘅決定嘅 (你都可以考慮申請獎學金㗎，e.g. HKSES)，但你可能要花更多嘅時間嚟說服佢地你想讀嘅科～ 以我為例，我都用咗一段時間先令佢地放心我去讀地理，因為佢地都比較擔心出路嘅問題。同父母商量好之後，就可以準備吓其他嘢啦。首先，最開頭你應該要research吓你想去邊間大學到讀，睇吓佢地啲課程合唔合乎你嘅興趣同埋睇埋啲收生requirement係點。你總共可以報5間大學，咁你有1-2間可以係進取啲嘅。其他要準備嘅嘢包括考慮吓自己F5去唔去考IGCSE (我身邊好多去英國留學嘅人都有考，因為考得好嘅話某程度上都可以增加你入讀心儀大學嘅機會)、F5升F6個暑假考唔考IELTS (IELTS可以拎倒offer之後先考，但我會建議儘早考咗佢，咁之後就唔使擔心咁多。同埋萬一你考咗出黎meet唔到個requirement都有多啲時間俾你prep過再重考)。你亦都可以開始構思吓自己嘅personal statement點寫 (英國同香港嘅制度有少少分別：英國除咗睇你嘅成績之外，佢地都會好著重你份personal statement嘅質素、份personal statement表唔表現倒你對嗰科嘅熱誠等等)。
2⃣ 訂立明確目標
當你規劃好所有嘢、填埋份UCAS application之後，就係時候訂立番啲目標！如果你各方面都ok嘅話，唔同大學就會俾conditional offer你，意思即係你DSE成績達到某個level就可以順利入讀嗰間大學。咁呢個時候你就要好好檢視吓自己邊科比較弱，需要努力啲先meet到個offer啦。當時我自己數學就比較弱，所以我study leave期間都主攻呢科，不斷操卷，放少咗力落其他我已經ok嘅科/英國大學唔睇重嘅科 (通常係中文同LS)到。
3⃣ 多手準備
去英國讀大學可以話係俾自己多一個選擇～ 你可以當佢係backup、當佢係你個first priority。但點都好，你都應該有多手準備，唔好咁快就放棄JUPAS或者去其他國家升學嘅機會。嗰時除咗報JUPAS之外，我都有報巴黎政治學院Sciences Po，最終好好彩佢都收咗我，所以個人就會安心啲～ 不過如果你係一心想入英國大學嘅而你成績又未達到要求嘅 (仲有一段距離)，可以試吓報foundation，咁樣都係另一種方式升讀番你心儀嘅英國大學。其實計埋讀foundation嗰一年都係同喺香港讀四年大學一樣！順帶一提，如果你到時DSE個成績差少少先meet到個requirement，應該可以去求情㗎！
今次嘅升學分享就到呢到，希望幫到各位同學❤️ 想睇更多心得分享歡迎去我網站 (www.geogaholic.com/blog)/ Instagram啲hashtags到 (已經幫大家分類好曬啲posts！) 🌟 Good luck🔥！一定要相信你一直以嚟嘅付出係會有回報㗎！