英國升學心得- 英國讀biotech + physiotherapy嘅懶人包 | 一文解答常見疑問

呢個post會解答番之前我喺story到收集番嚟有關biotech同physiotherapy嘅問題,希望幫到大家喇🙌🏻 多謝 @the.jo.1312 嘅詳細分享🤩!


Biotechnology

Biotechnology係讀咩?

Biotechnology嘅核心課程內容係同基因DNA有關嘅,例如學吓DNA嘅特性同埋改變DNA嘅唔同方法,但除咗學關於DNA嘅課程之外,亦有一啲基本必修嘅課程幫你打好根基,例如Biochemistry, Plant Biology, Animal Biology, Chemistry 等等。所以唔好以為讀Biotechnology就唔使讀其他你可能討厭嘅科目。


會唔會有好多實驗?

讀Science嘅話基本上都會有實驗(Lab Session)啦。我覺得數量還可以,實驗佔所有科目(包括其他必修例如social science) 大約30%,但我覺得lab session 比較好玩,可以親手做實驗,睇住平平無奇嘅大腸桿菌喺自己手中被插入唔同嘅基因最後發光,覺得真係好神奇。 Lab session嘅內容做啲咩就視乎你嘅課程係咩啦,有chem lab,phy lab,biotech lab,學吓點樣培養細菌、抽取DNA、用唔同嘅儀器去分析,用唔同嘅方法去改變DNA等等。


中學冇讀Science/M2 可唔可以讀Biotechnology?

據我所知,喺香港嘅大學冇強制性要求中學有讀Science先可以修讀Science Degree,但英國大學多數會要求你修讀最少兩科Science-based嘅科目,包括Physics,Maths,Chemistry同Biology。數學大家都會讀,只要有phy、chem、bio其中一科就可以。當然,讀Biotechnology嘅話,有修讀Biology絕對會對你將來入讀呢科有大大嘅幫助。


讀完課程之後同預期有冇落差?

我覺得落差點樣都會有啲啦,就係lab session嘅自主發揮空間唔多,好多時侯要學同複習嘅Technology都比較多,變相就少咗自己探索嘅空間。雖然喺香港嘅就業空間唔大,但我修讀這課程係為興趣,覺得學到同了解到嘅嘢比起預期中嘅多好多!


出路

唔知大家有冇聽過,香港會叫Science做「嘥銀時」,意思就係嘥錢同時間。坦白講,喺香港讀Biotechnology,相關嘅出路好有限,頂尖嘅學生多數都會跟教授繼續讀上去。想要相關嘅工作好大機會都要去內地,因為香港冇生物科技嘅大公司,所要唔少畢業生最後都從事唔太相關嘅工作。但喺英國,機會就比較多,有唔同嘅大學實驗室或者係科研嘅機會,仲有唔同生物科技嘅公司,甚至Biotechnology職業喺移民職業中亦榜上有名,出路比香港更多。

Biotech呢科值唔值得揀?

視乎你讀大學嘅目的係咩啦,係為興趣、為賺錢、定為出路⋯⋯我只可以話如果要賺大錢,讀Biotechnology係冇咩可能(笑)。


Physiotherapy

我嘅課程係MSc Physiotherapy (Pre-registration),意思即係俾外行人讀嘅Physiotherapy accelerated Master course。課程內容大致同UG嘅一樣,只不過由三年課程緊密排到兩年時間。以下講解嘅都係建基於我嘅master course,UG 相關嘅會特別標明。

Physiotherapy係讀咩?

解剖學 Anatomy、生物力學 Biomechanics、生理學 Physiology同埋點樣為病人制訂療程等等。


Top 5 University Preference?

排名嘅話年年都唔一樣,大家上網都可以搵到,不外乎都係University of Southampton, Robert Gordon University, Cardiff University等等,但唔係每一間都有MSc Physiotherapy (Pre-registration)嘅課程,所以要留意清楚。但本人唔係特別睇重排名,因為喺英國受認可嘅物理治療課程都受到 the Health and Care Professions Council (HPCP)同the Chartered Society of Physiotherapy (CSP)嘅監管同認可,所以課程內容同品質都係保證嘅。


Interview會問咩?

自我介紹、點解對物理治療有興趣、對物理治療有咩了解、你覺得物理治療師需要具備咩條件、點解揀我地呢間大學、對我地嘅課程嘅了解,一啲模擬情況嘅問題等等。有興趣嘅話,我可以另外再詳細介紹。


好難畢業?

我仲未畢業,好難答到呢條問題。但讀物理治療嘅大家都係好努力嘅,要識背書,亦都要靈活變通,活學活用。


關於實習

我嘅實習都係學校安排嘅,因為課程要滿足大約1000個鐘嘅實習時數,每個課程介紹都會講低佢地提供嘅實習時數。


實習個時候同patients溝通一定唔容易,因為英文並唔係我嘅母語,我並唔可以好似講廣東話嘅時候咁流利。不過,同patients溝通,「聽」同「說」都好重要,所以你本身嘅英文程度要有一定嘅根基。然後要了解唔同嘅人表達方式都會有不同,唔肯定嘅時候要多啲問patients同tutors。好彩我遇過嘅patients都好友善,亦好願意俾機會俾我地呢班實習生,我真係從心底覺得感恩。


點樣獲取執業資格?

如果你報讀嘅課程是受到HPCP同埋CSP嘅監管同認可嘅話,畢業就等於可以取得英國執業資格,並且喺香港免試申請執業資格,但仍然要物理治療師管理委員會審核資歷。有興趣嘅話,我之後都可以另外再詳細介紹。


物理治療師以外嘅出路

雖然我唔知道如果你辛辛苦苦完成咗物理治療課程,都唔做物理治療師係點,但最相關嘅職業應該淨係得教育,但呢方面我都唔係好清楚。其實物理治療並唔係只係限於醫院同私人診所嘅。有興趣嘅話,我之後都可以另外再詳細介紹。


有冇報讀Master嘅tips?

有!好多!由點樣準備自己,面試要留意嘅嘢,到上堂要注意嘅嘢都有好多想分享俾大家聽!所以follow @the.jo.1312 啦!