今日想同大家分享五個英國生活小貼士💡去英國留學嘅你一定要睇呀🇬🇧
1. 點樣預防畀人偷嘢？
之前都提過，倫敦嘅治安一般。好多我身邊嘅人都有試過畀人偷/搶嘢，除咗自己小心啲之外，我會建議大家平時唔好行咁近馬路邊。因為好多偷嘢嘅人都係踩單車架！行入啲行人路會比較好～ 去餐廳食飯嘅時候都應該盡量避免將部手機放喺檯面(尤其是你去廁所嘅時候)仲有，如果夜晚自己一個喺條比較靜嘅街到，如非必要真係唔好拎部手機出嚟用！
2. 成日落雨點算？
大家都知道英國成日落雨，但佢大部分落雨嘅時候都係毛毛雨咁，所以我會建議大家買一件防水同埋有帽嘅褸！有帽超級重要，因為有時候落雨係大風到擔遮都完全冇用！另外，我每次出街之前都會喺weather.com到check吓當日嘅天氣報告，因為佢可以顯示埋大概幾多點會落雨，我自己覺得幾準！
3. 路痴救星- Citymapper
人生路不熟點算？Citymapper就啱晒你！呢個app真係好好好有用，仲有用過Google Map！佢顯示嘅嘢多好多，例如班車幾時到站、車費、邊個車卡上車最好、預計到達時間等等。
4. 硬水應對方法
雖則啲水如果係喺凍水個tap出係可以直接飲用，但我就冇咁做。就算唔想煲水快啲飲，都應該自己過濾咗先！熱水煲亦都應該定期用descaler或者其他方法定期去除水垢。其實如果真係再懶啲，我有時都會自己喺上網買生活用品嘅時候順便買啲大嘅枝裝水飲，咁就可以一次過送埋貨，唔使自己去抬咁多重嘢。
硬水嘅另一個問題係好傷頭髮，我聽人講其實可以喺花灑到安裝個軟水器，咁就解決到硬水呢個問題～
5. 餐廳可以幫你split the bill？
喺香港嘅話好少可以幫你split the bill，但英國就唔同啦！只要你係埋單嘅時候同佢講話想split it into half或者其他分法就得架啦！咁就唔使之後自己再計過條數，又要過數(英國唔興cash)畀朋友啦！