英國升學心得- UCL History | 識背書就完全冇難度?歷史系畢業之後嘅出路又係點?

今次係我朋友搭上搭搵咗佢嘅朋友同大家分享吓UCL History嘅嘢!超級感激兩位😭❤️~ 希望大家嚟緊UCAS揀去邊間大學讀邊科嘅時候,可以作出最明智嘅抉擇🔥! 1. UCL History 到底係讀啲乜? 一般嚟講,大學讀歷史會比大家係初中、高中接觸嘅歷史有截然不同嘅地方。既然係history,背書係歷史科嘅基本,年份、人物、數據等喺考試入面有一定嘅用途。但係喺大學讀歷史會多咗一啲要求,就係無論喺 exam 定係 paper 部分,要求嘅唔單止係背書,而係要求對一個歷史題目嘅historiorgraphy(史學史)嘅認識。佢嘅意思即係要你學一個歷史嘅argument入面,有啲咩嘢historian,曾經發表過乜嘢嘅言論,喺一個topic入面有冇一啲唔同派嘅諗法,由邊位歷史學家代表等等。Historiography嘅理解同掌握對我作為first year嚟講都係第一個主要克服嘅難關。 第二,UCL 嘅歷史科第一年會用頗多嘅教學時間喺三個叫做‘core subjects’入面,分別係 writing history, making history 同 approaching history。呢啲核心科目一定要讀,主要係幫學生打好一啲歷史科入面嘅基礎概念,包括historiography、唔同嘅historiographical concepts/theories 嘅介紹等等。其餘嘅科目屬於自選,可以揀兩個survey modules,學校建議最好唔好兩個都係近代史。每一個survey都會有論文(2500字,連footnotes)同埋考試,不過考試今年就取消咗,遺憾未有機會同大家分享。 2. Faculty 當然,牛津劍橋喺歷史呢方面絕對係頂尖學校,喺歷史學術領域入面亦都係非常之強,但係UCL同埋其他英國嘅大學都唔係一定次等。 好多UCL嘅professor都非常出眾,我所接觸嘅都係英美傳統名校畢業、做研究,包括牛劍、Harvard、Columbia等等,教學水準都非常高。一般嚟講,我所遇到嘅prof教書都有水準,唔會馬虎,而且office hours去搵佢哋都好有心機教我。 3. 成績要求 DSE: 英文、數學: 5|中文、LS:3|選修科(有Hist):555 IELTS (academic): Overall 7.5, 每個subset至少有6.5 4. 出路 喺英國,讀歷史嘅人通常已經諗定自己嘅出路,一係就喺從政,一係就係諗住投身學術界,一係就諗住考公務員,但係其實出路唔一定係咁。例如我有個同學,讀咗history之後發現自己好鍾意金融,出去都搵到好多一位難求嘅實習嘅機會。其實,喺英國history都唔少人睇得起,因為歷史學培訓出嚟嘅人通常寫嘢能力都唔錯,識得獨立思考,有頗高嘅判斷能力。呢一類嘅skills對將來搵工都應該幾有用。

英國升學心得- UCL History | 識背書就完全冇難度?歷史系畢業之後嘅出路又係點?