英國讀物理治療 UK Physiotherapy懶人包 | 同職業治療有咩分別? | 面試貼士

今次係physiotherapy嘅分享,好開心呢個系列可以cover到更多嘅學科😆 多謝 @study.physio.with.me 嘅分享,非常之詳細❤️ 呢科究竟讀啲咩? 物理治療主要分為三大科目:Musculoskeletal (肌肉及骨骼) Cardiorespiratory (呼吸及循環系統)同埋Neuroscience (神經科)。而當中你會學到Anatomy (解剖學), Pathophysiology (病理生理學), Physiology (生理學), Kinesiology (運動機能學)同埋Biomechanics (生物力學)。 英國嘅physio同香港嘅有咩分別? 我冇喺香港讀過,所以都唔係太清楚。不過最主要嘅分別應該係喺香港嘅物理治療除咗要讀上面提及嘅核心科目之外,仲要讀主科同埋要自己reg科。喺英國讀就淨係要讀核心科目同埋唔使自己reg科。 呢科同OT有咩分別? 物理治療係通過唔同嘅物理方法去評估同埋治療病人,透過針對性嘅康復運動同手動治療(manual therapy)去幫助病人舒緩痛楚,加強活動能力同心肺效能,促進恢復日常活動能力。 職業治療入面嘅「職業」唔單指係工作,而係指日常生活中所有嘅活動,主要分為自理、工作同埋娛樂。 自理 = 自我照顧 (i.e., 換衫,食嘢,沖涼 etc.) 工作 = 返工/返學 娛樂 = 娛樂活動/社交活動 職業治療師會以運動為基礎,透過活動、治療、提供輔助儀器、環境改裝(e.g., 改裝浴室/加裝扶手)減輕傷殘帶來嘅影響,令患者可以有能力在屋企、社交環境或工作中獨立生活,重新投入社會。 用一個病徵去做例子:柏金遜症患者好容易會跌親因為佢哋嘅平衡力會降低。 物理治療師就會利用一啲運動去逐漸強化佢哋嘅核心肌肉去增加佢哋嘅平衡力從而去減低佢哋跌親/受傷嘅機會。 職業治療師會透過合適嘅輔助器具去幫助患者例如係屋企裝一啲扶手咁或者就可以扶住黎行從而去減低佢哋跌親/受傷嘅機會。 其實PT同OT好多時候都係一齊做嘢嘅,係「拍住一齊上」嘅好拍檔,最終嘅目標都係盡量協助patient佢哋重返健康、快樂、有意義的生活。 呢科適合咩人讀? 首先一定要係你自己鍾意讀呢科,對呢一科有興趣,而唔係因為受到外在因素嘅影響而去讀 如果唔係你就會覺得呢一科好難捱,讀得唔開心。 第二你有一個好嘅溝通技巧同埋願意去聆聽patient所講嘅嘢 (i.e., 讀書嘅時候你會用到好多專業名詞,行內人一聽就會明。但係當你同patient溝通嘅時候就要用番一啲佢哋聽得明嘅語言)。 第三你要係patient-centred。你要識得點樣從 patient 一角度去睇佢地嘅問題,睇吓佢哋想 achieve 啲咩,從而為佢哋提供適合嘅治療。 第四你要唔怕污糟/核突。特別係當你喺醫院做嘢嘅時候,有啲patient係當你一mobilise佢嘅時間就會open bowel,咁呢個呢個時候你就要幫佢哋清潔。又或者係你見一啲呼吸系統有問題嘅病人,因為佢哋有濃痰而影響咗佢哋呼吸,呢個時候你就要幫佢哋抽痰。 呢科讀得辛唔辛苦? 辛唔辛苦其實都幾個人嘅,但係話完全冇難度嘅話就一定係呃你嘅,因為話晒都係一科專業。個人認為最難嘅係去背muscle anatomy,因為你要知道每舊肌肉嘅 origin, insertion, function, nerve innovation,不過呢啲都係因人而異嘅啫。其實好睇你努唔努力,,如果你入咗uni之後日日出去玩,臨考試先來讀咁一定辛苦啦。 Interview tips? 首先你一定要知道物理治療師係做啲乜嘢 (e.g., 同 OT有咩分別, 會見咩類型嘅患者, 物理治療師可以喺邊度做嘢, 有咩治療手法etc.)。另外就係點解你會想成為一個物理治療師?。 如果你係英國大學嘅面試,你就一定要知道 NHS 6C value (care, communication, compassion, courage, commitment, competence)。 其他常見嘅面試問題: 你覺得自己點解符合成為一個物理治療師? 一個物理治療師需要具備咩條件? 舉例一啲物理治療師會處理嘅病徵 你點樣去自己嘅處理壓力 你點解揀呢佢哋嗰間大學 etc 另外除咗普通嘅問答之外,佢哋仲會俾一啲情境題你。 最大嘅建議就係去攞一啲物理治療嘅經驗。E.g., 去醫院/私家診所跟物理治療師學吓嘢,又或者去老人中心做一啲復康嘅工作,令你可以喺interview裏面分享經歷,證明你對呢一科嘅興趣同埋證明你對物理治療嘅了解。 你會推介邊幾間英國大學? 我就冇話特別推介邊間大學嘅,不過大家可以上League tables of universities for Physiotherapy (https://www.thecompleteuniversityguide.co.uk/league-tables/rankings/physiotherapy) 呢個網站去睇吓所有physio uni 嘅排名,佢哋會幫你整理好晒所有數據等你容易啲去揀邊間合適嘅大學。 但係我想同咁多位講,唔好俾咁壓力自己,大學嘅排名同埋知名度絕對唔會影響你成為一個點嘅物理治療師,加上物理治療係一個專業資格,所以對於你讀邊間大學同你搵工唔會話有特別大嘅影響。 個人認為如果喺year 1 有實習嘅話會好好多,因為會更加令你清楚明白到物理治療師係會做啲乜嘢嘅,有啲人真係會因為實習完發現唔適合自己而冇繼續讀。 最後好重要嘅一點係如果你讀完書之後想返香港做嘢嘅話,你一定要check吓間大學到底香港係咪認證嘅。你可以上呢個網Physiotherapists Board check Quotable Qualifications (https://www.smp-council.org.hk/pt/en/intro.php) 去睇吓間大學喺唔喺個list上面。 讀一年大概要幾多錢? 每間大學嘅學費都唔同,睇吓你揀邊間。如果淨係講課程價嘅話 International學生一年大概 £13,320 – 28,050,而 Local 學生一年就大概 £9,000 – 9,250。但係除此之外你都仲要計埋住宿費同埋日常生活費等等。物理治療其實都仲會有其他Additional fee: Placement (accommodation, travel fee), gym instructor course, sport massage course等等。 要讀幾多年先可以成為一個physiotherapist? 3 年 full time + 4-6 年 part time,課程係會已經包含臨床實習。 喺英國成為一個physiotherapist嘅過程係點? 最簡單直接嘅方法就報讀BSc Physiotherapy 課程。如果唔夠分入唔到呢一科都唔緊要,可以先入讀一啲相關嘅BSc課程 (i.e., sports therapy) 然後再讀 MSc Physiotherapy。

英國讀物理治療 UK Physiotherapy懶人包 | 同職業治療有咩分別? | 面試貼士