香港卓越獎學金計劃 HKSES 申請及面試心得分享 | 準備功夫+面試題型 | 成功秘訣

終於搵到我一個拎到HKSES嘅朋友解答吓大家關於HKSES呢個獎學金計劃嘅問題。超級感激我呢位朋友咁用心答大家,佢答嘅嘢詳細到我要開兩個post😱❤️,亦多謝之前大家好踴躍咁喺IG Story到留低自己嘅疑問~ 如果有意去外國讀書嘅,都可以留意吓呢個計劃,因為拎到嘅話除咗可以減輕學費負擔之外,亦都可以證明自己嘅實力🔥! 1. 準備(中五至中六12月) 首先想推介大家去獎學金網站到睇常見問題,入面會解釋得更加詳細同全面(https://hkses.edb.gov.hk/en/faq.html)。 簡單去理解,首先我地要獲取一啲知名學校嘅offer (可以睇番獎學金網站上面嘅排名),因為政府只會喺你被無條件錄取(unconditional)之後先至會發送面試邀請。所以你中六上學期至到12月除咗要準備DSE之外,都需要focus喺入學申請同獎學金申請。獎學金申請通常喺12月尾截止。 Timeline: Aug - Dec/Jan 入學申請 (UCAS, Common Application etc) ,唔同學校有唔同報名deadline Dec 獎學金申請截止。申請係透過一個online system申請,你需要準備(我有啲健忘所以唔太肯定全部): 你有收到/predict會收到嘅大學offer/ 你個application status (收到offer/畀人reject咗) Predicted grades Cover letter/application statement Reference letter 校長評核表 獲獎記錄、課外活動、社區服務 等等... Mar - Jun DSE/其他公開考試開始 After DSE 將confirmed offer proof send畀HKSES Jul - Sep HKSES安排面試、confirm你個offer (通常九月前會有結果) 值得留意嘅係,校長需要填寫一份類似校長評核表嘅嘢,而且你需要老師嘅推薦信。所以,我會建議由中五開始就要打好同老師嘅關係,唔係話要去suck up to 佢地,你做自己嘅時候都一定要有禮貌。而且,你要證明畀佢地睇你好有決心要出國讀書 (即使自己家庭條件可能唔係好好)。我當時讀嘅學校係好普通嘅Band 1屋邨學校,老師對外國大學申請嘅研究同埋資源都唔多,所以當時喺中五一開始我就同佢地講咗自己嘅計劃,畫咗個UCAS application timeline,請教佢地意見,話畀佢地知幾時需要麻煩到佢地幫手etc。呢個就係打好關係嘅第一步,用行動話畀佢地知自己係好堅定、好有決心。 Reference Letter 無論同個老師幾熟都好,我建議大家去draft 一份invitation of referee 嘅email,當中講吓自己申請獎學金嘅背景、申請進度、話畀老師知佢可以點樣幫自己等等。如果同個老師熟,甚至可以attach一個有自己嘅ECA同獎項嘅list。但切記留意語氣,唔好好似自己coach緊個老師點寫個reference letter 咁哈哈,啲長輩會覺得被冒犯。可以禮貌地講類似話「為咗方便您,我整咗個list,如果您有需要,可以望吓,麻煩晒」~ something like that,然後記得要好好多謝番老師。 學科選擇 政府網站寫明STEM Subjects會有優勢,入咗嘅好多同學都係讀理工科,但我自己係讀歷史,所以認為只要係其他條件符合,面試表現正常都不妨一試。入咗個Scheme都係發覺啲官員其實都係好想幫多啲公立學校嘅同學,所以大家係面試嘅時候可以清楚提及自己嘅處境,例如如果無咗呢筆錢,冇辦法出國讀書等等。如果係讀medicine,恕我呢方面真係唔敢亂答,但可以打去問吓秘書處,或者可以提及自己返港之後點樣落實執業嘅計劃(if any),或者話有志加入學術界?最主要show到自己可以貢獻香港社會同埋你嘅實質計劃係咩。 我覺得除咗成績考試等等嘅硬性準備,成個過程係好考自己嘅心理質素。因為去到11月、12月,除咗prep DSE同UCAS,你仲要繼續搞埋獎學金,壓力唔會細。我好記得放假嗰啲都無玩過,一日到黑都係喺自修室到搞個申請。佢要求你遞交啲獎狀嘅副本,然後(同埋而家都係)科技白癡嘅我喺到用部電話scan,然後搞嚟搞去,真係命都短十年~ 但長遠去睇,自己係會覺得點都值得。 學業成績要求、ECA 我DSE係讀文科,選修係中史、西史同中國文學,總分係44分,有五科5**。另外,我喺中五、六都有自修8科美國大學先修課程(Advanced Placement)課程,有關於經濟同社會科學。雖然個scheme有話自己睇重領導才能等等,但事實上,我認識嘅scholars 其實都至少有3-4 科5**。 其次,我當時嘅心態係:唔好放棄任何一個可以證明自己嘅機會,即使嗰樣嘢只係所謂嘅「數字」。其實成績對於你喺大學嘅時候搵實習都非常重要。因為我覺得成績揭露咗我地嘅work ethics,同埋可以證明到自己可以為咗一個目標有幾努力。畢竟香港仍然係一個比較睇成績嘅地方,所以大家都一定要確保呢方面自己有盡力。加油~ 2. 收到大學unconditional offer (大概DSE放榜後)+ 安排面試(暑假7/8/9月) 收到大學unconditional offer之後就send畀秘書處,然後等安排面試。面試通常係4-5人一組,組員係一啲讀差唔多科目/相同科目嘅同學。面試題目分為3種: 第一種問題係motivational question (e.g. why this subject? why this uni?), 一定需要展示到對嘅科嘅熱誠同埋計劃 (i.e. 知道自己做緊咩)。大家可以換個角度諗,呢個計劃係用納稅人嘅錢去供養一個同學,一年用20-30萬去外國讀書,三年計埋通脹分分鐘就嚟一百萬。所以喺面試嘅過程中,面試官就有如篩選緊一個值得投資嘅股票/project咁考量你。我地一定要不斷問自己:why me? 同埋要顯示自己係"investable"。好似買股票咁樣,你要政府畀資源,都一定要證明番畀佢睇你同你想讀嗰科非常具有增長潛力,最後可以為社會帶嚟益處。例如你想做公務員,你就要知道你想讀嗰一科嘅邊一堂、邊一個professor嘅publication on某個議題可以幫助香港邊個方面嘅長遠發展 (e.g. 房屋)。而你都要了解吓你嗰科嘅畢業生有幾多%係入咗各國政府做、做咩role、係咩field 嘅專家。咁你又會點樣善用大學同當地嘅資源?例如我當時直情係有講到我申請嘅大學裡面嘅某一間學會嘅名同佢而家聯合咗邊間公司搞緊啲咩活動,我點樣可以從中獲益。面試官聽到都幾驚訝~ 我都有背埋當時歷史系畢業生有幾多%係入咗我想做嘅行業,因而成為寶貴嘅人脈資源。另外,如果你想入financial industry,你可以話有啲英國投資銀行有一樣叫Spring Week嘅嘢畀year one 嘅同學參加,但香港嘅分行就淨係有Summer Internship,所以應該趁早建立國際connections(例如第時喺香港做deal,打去倫敦office嘅時候聽電話嗰個位可能係你地year one已經做喺internship到認識,係咪方便好多先~)。所以,咁樣就可以表達到我地去海外留學會比香港同學獲取更多firm同career insights。 第二種係時事,當時面試係有問及逃犯條例,有問我地覺得政府有咩做得唔好,甚至有問如果倫敦有反政府示威你會唔會去。個人認為答案一定要有邏輯、論點同證據。我個人唔覺得政治立場會影響面試結果,只要你知道自己講緊咩就可以。例如當時個教育局官員問我地覺得政府喺處理某件事嘅時候做得好唔好。其實就好似通識咁~ 我首先會講自己嘅立場,然後再講原因同證據。例如某個department 發佈嘅新聞稿當中嘅咩細節令我有咁樣嘅唸法,或者某位官員講咗啲咩、有d咩唔合理或者合理嘅地方等等。唔好畀個問題拋一拋,點都扮冷靜,處理好條問題。 第三種問題係有關香港嘅。雖然香港仍然係有好多制度上面嘅唔公平,作為一個社會仍然有無數可以改進嘅地方,但我相信大家唔多唔少都對呢個地方有一種聯繫。我記得當時面試官問到:「如果你地去同外國嘅同學介紹香港,你地會點介紹?」。我當時係話,我想話畀佢地知香港並唔係一個單純嘅國際金融中心,我覺得佢係一個好幸運嘅地方。因為你睇番歷史(又sell番自己讀果科哈哈),你會發覺每一次呢個地方嘅人民遇到災難,總係可以將一切苦處轉為好處,例如文革帶畀香港資本家、六四事件帶畀香港有限度嘅民主化等等。好似每一次都有唔好嘅事情發生,我地總係可以迎難而上。但我想話比外國嘅同學知,It's the people that make all the difference。所以盡量諗個新穎啲嘅approach,用吓自己嘅情感同諗法。 可能我係一個比較感性嘅文科生哈哈,當時準備面試嘅時候,真係有好好去唸香港對自己嘅意義。我一直唔鍾意香港嘅教育制度,奈何屋企無能力支持自己喺中學就出國讀書,所以一直都好想好想走。再細個啲嘅時候,唔中意呢個制度,有同老師去抱怨。我記得佢講話:「其實帶住腳鏈跳舞嘅人先係最勁」。你要話畀個制度知,我唔鍾意你,但我依然可以戰勝你。 我始終覺得,香港係一個相對公平嘅地方,因為你始終可以透過成績去證明自己。希望睇到呢度嘅同學仔勇敢去報。當你交表果刻,已經贏咗好多好多人。Don't settle for less。條條大路通羅馬,但有人係出生係羅馬。但與其終日諗「總有些人在山頂,總有些人在山腳」,我更相信「總有些人幸福點,但卻阻不住你爭氣點」。

香港卓越獎學金計劃 HKSES 申請及面試心得分享 | 準備功夫+面試題型 | 成功秘訣