LingU Social Science 嶺南大學社會科學 JS7300 | 有咩嘢stream?多exchange機會?出路?

呢個系列好似好耐冇update過啦~ 今次用關於LingU嘅info,好感謝我超nice嘅朋友❤️ 希望可以儲齊晒香港咁多間大學嘅資訊畀大家🤤 1. 課程內容 利申:我係2017 entry,所以我唔太清楚之後嘅syallbus有冇變。 嶺南嘅Social Science 細分4個major、1個stream (大家當有5個major揀就可以:包括有經濟學、心理學、政治學、社會學、社會及公共政策同埋亞太研究)。而year1 一開始就要讀4個嘅intro course,相對俾大家對唔同major有基本概念。然後year 1 差唔多完sem就要揀major,之後嗰3年就可以專注讀自己有興報嘅科,所以year 1嘅GPA係比較重要!因為都會影響到自己揀唔揀到心儀嘅major架!心理學通常係學霸aim嘅major,所以想讀心理學嘅同學仔嘅GPA最少一定要過3架。 而我係讀社會及公共政策,之後嗰幾年就係讀吓唔同嘅政策,例如房屋政策、環保政策、勞工、教育以及社會福利嘅政策,涉獵範圍比較廣,學到唔單止香港,甚至係外國嘅政策,可以話係通識科嘅詳細版。而畢業前要搵professor做一份Junior Research Project,呢個係compulsory;而Senior Thesis就係 optional。如果有志做研究或者想再讀上去嘅同學仔就可以考慮做埋,唔做嘅同學仔亦都可以讀多科course elective,完成120 credits。 2. 教學與考核模式 每一科主要都係有presentation、midterm/reflective essay加final。有啲科每個禮拜都要睇文,然後喺tutorial同prof一齊討論。Presentation通常兩至三個同學一組,題目就係prof定好,或者跟據課程自訂題目,present大概20-25分鐘。而final 通常以寫essay為主,例如點樣apply番一個理論落實際情況之類。只要平時表現正正常常個grade都唔會太差。 而上堂模式普遍都係2個鐘lecture,1個鐘tutorial。(p.s. 有時lecture會成堂播電影上堂架) 3. 適合咩人讀? 我覺得會適合一啲文科生讀,因為呢科都要睇文又要寫文,亦都適合關心社會嘅人讀,因為呢科同平時日常生活接觸到嘅野都息息相關,唔算比較抽象,甚至可能會明白政府點解要實行呢個政策嘅理念之類。 4. 出路 其實出路有好多,因為讀既嘅比較general,所以係唔同範疇既工都可以嘅。 通常讀呢科既人都係會想投身政府工,或者係入NGO。甚至可以入大公司做management trainee,投身business嘅都有,所以咩工都啱。 5. 大學特色 嶺南嘅特色係博雅教育,亦都確保學生可以有hall life,所以相對上呢到都可以畀到學生4年全宿嘅機會架。而嶺南就有10棟hall,當中咩類型嘅hall都有,例如有好yo好chur,亦都有係專心讀書嘅,大家可以根據自己理想嘅大學生活而選擇。住hall亦都係建立友誼嘅好機會,所以hall莊會安排唔同嘅活動畀宿生,例如新生可以參加ocamp,之後亦都有入伙酒、校服p、secret angel、球類比賽等活動。組爸媽都係好friendly嘅,令大家都可以融入到大學嘅生活。 另外,嶺南去exchange嘅機會相對比較高,有sem/winter/summer exchange,所以都可以畀學生一嘗出國留學嘅滋味!

LingU Social Science 嶺南大學社會科學 JS7300 | 有咩嘢stream?多exchange機會?出路?