UCL BSc Biochemistry | 生物化學讀啲咩?出路?| 同場加映:UCAS揀大學嘅心得

課程結構與內容 簡單嚟講,Biochemistry = 化學+細胞,主要係用化學嘅觀念了解我地細胞嘅操作。 Year 1: 一共有8個必讀嘅modules,包括1個化學module同埋7個與細胞有關嘅modules (例如基因組學、細胞、微生物)。 Year 2: 大概有8個modules,但今次嘅自由度比較大,可以自己選擇。你可以繼續讀biochemistry或者揀molecular biology嚟讀,呢兩個主要嘅分別就係在於後者冇化學嘅module。其實啲modules同第一年幾相似,仍然會係關於微生物、細菌、細胞組織等,但當然會更深入。 適合咩人讀? 想知道細菌喺我地身體入面係點樣引起感染?或者想了解細胞係點樣溝通嚟產生反應?我地食過嘅蛋白質係點樣被消化系統處理,然後身體又如何製造蛋白質?如果你對呢啲都有興趣,呢個課程就適合你啦! 教學模式 Lecture|Tutorial(每一兩個禮拜一次)|實驗(一般三個鐘,兩人成群,畀你繁殖細菌等等) 考核模式 年尾exam|MC Quiz|Lab report| Coursework essay 要有咩心理準備? 有一兩個嘅modules需要你睇人地嘅研究作文題然後自己再寫一篇。Year 1嘅essay可以長達5000字! 你都要有心理準備要背好多過程同埋蛋白質嘅名,呢啲內容有時都幾多㗎。 成績要求 DSE: 英文: 5 | 中文、LS: 3 | 數學 (core): 5* | M2: 5 | Bio: 5* | Chem: 5* | 其餘一個elective: 5 IELTS (academic): Overall 7.0,每個subtest至少要有6.5。 出路 最直接嘅出路就是係做研究或者lecturer,但亦都可以喺唔同行業到做研究,例如確保保健品能夠安全食用、改善化妝品嘅效果、生物技術創業等等。當然,生物化學而家最熱門嘅話題就係COVID-19嘅疫苗研發! 同場加映:揀大學嘅心得 咁多間大學,應該揀邊一個好呢?我喺呢到就順便同大家分享一下我自己當時係點樣作出選擇。雖然每個人都有唔同嘅諗法,但希望我嘅分享都係可以幫到你啦~ 1. 大學排名 喺一間排名比較低嘅大學到讀書唔係唔好,我覺得更重要嘅係你想同邊種人相處。我好慶幸喺大學到遇過好多同我經歷同夢想比較相似嘅朋友,所以更容易溝通同埋互相了解對方。雖然每間大學咩嘢人都有,但頂尖大學通常都有好多學霸,整體上大家都好勤力,所以就睇吓你鐘唔鐘意呢種環境啦。有啲人話:去哈佛大學唔係為咗佢地嘅課程,而係為咗同嗰度嘅學生同老師交往,畢竟哈佛嘅課程遍喺網上都可以搵到。 2. 大學文化 建議大家上網睇吓啲大學生嘅blog、學生forum同埋vlog,因為佢哋都可以畀你窺探到大學生真正嘅生活係點。例如喺啲論壇到,有啲評論會話Imperial嘅workload一般都比UCL多。。記住,同一間大學都可以畀唔同人兩個完全相反嘅經驗,所以睇啲評論嘅時候都要睇多幾個先可以再作更近一步嘅了解。我覺得如果有機會嘅話,最好就係可以同嗰間大學嘅學生傾吓偈,了解一下佢哋喺嗰度嘅生活,或者可以畀到一啲提示畀你。 3. 環境 你鍾意點樣嘅生活?鍾意近城市定郊區?倫敦嘅優點包括咗佢嘅國際化同多元化嘅活動同美食,時不時都可以畀你參觀吓啲旅遊景點等等。但係出門都係有少少危險,而且生活費都幾高。如果每個禮拜出門玩嘅話,我銀行戶口都會乾塘哈哈~

UCL BSc Biochemistry | 生物化學讀啲咩?出路?| 同場加映:UCAS揀大學嘅心得