UK Business & Management Foundation 英國大學基礎課程 | 常見問題 | 讀啲咩?保證可以升上英國大學?

超級感激呢位follower主動同我講佢可以幫手share關於UK foundation嘅嘢❤️ 希望呢個post幫到迷惘中嘅你🔥! Hello大家好! 多謝你地想睇關於foundation嘅嘢,俾咗呢個機會我分享!我喺英國西北部嘅大學讀緊Business and Management Foundation。 1. Foundation係咩嚟? Foundation中文叫做大學基礎課程,主要係俾完成中五或DSE成績未達到大學入學分數嘅學生。一般分2種,一種係uni based(One to One Foundation),另外一種係college based(One to Many Foundation)。兩種都係唔需要經UCAS去報,可以直接經agent去報名(一般agent都會收翻visa手續費,其餘都一律唔會收。至於唔經Agent報唔報到呢樣,我唔太清楚,foundation辦學機構好似係同agent有聯繫,所以穩陣少少都係經agent報會好啲)。只需要提供中五全年成績(需要4科至少及格,唔計算中文)(對象: 完成中五就去讀)或者DSE成績(對象:DSE考生)以及IELTS 成績證明(每個foundation入學要求唔同,我學校要求總分5.5,全部不低於5.0) College based 係根據你嘅成績、排名同能力去選擇大學,呢類嘅foundation一般都會係college到上堂,有機會入住寄宿家庭或者學校宿舍,不過聽聞學校宿舍係有規定熄燈時間。除咗要符合大學要求之外,仲要額外考多一次IELTS,達標先可以升學。 Uni based則係只要達到學校要求嘅分數就可以直接升讀該大學嘅year one,喺大學入面上堂,仲可以享受同大學生一樣嘅待遇,例如擁有大學學生證,參加society,使用sports centers等。一樣都係住喺學校入面嘅宿舍,一般大學對foundation學生會優先提供宿舍,除非你真係好遲好遲先confirm 你嘅學位。如果唔係,一般都有宿舍提供。 我學校提供春秋兩季入學,即係10月以及1月入學,兩季入學同樣都要讀3個term。如果10月入學,就係 Michaelmas Term(10月-12月)、Lent Term(1月-3月)、Summer Term(4月-6月);而1月入學則係Lent Term(1月-3月)、Summer Term(4月-6月)以及7-8月。 由於我係讀One to One Foundation,所以啲資料基本上都係圍繞One to One Foundation爲主。 2. Foundation 讀啲咩? 一般Foundation分6個範疇: Business and Management, Social Studies, Law, Life Science, Mathematics and Statistics 同埋Engineering and Computing。Foundation除咗會讀你大學會讀嘅科目嘅基本知識,例如我讀Business and Management,上堂係要上Account、Business Studies、Maths、Economics,而Social Studies 就會讀Globalization/Maths、Politics、Psychology、Media and Culture等等,另外都要上英文堂(Academic English Skill,簡稱AES),tutorial 同埋 Project Research Skill(簡稱PRS) 堂。Foundation老師係會俾功課你,佢地俾嘅功課一般都係預習或者鞏固。Business Foundation嘅課程同DSE有少少相似,我中學係有修Economics,所以foundation嘅Economics對於我係比較得心應手,Economics同香港DSE差唔多都係讀Micro 同埋Macro,雖然老師俾功課會係俾畫圖題比較多,但係coursework 一般都係essay。有同學中學修讀BAFS,因爲香港喺學美式會計方法,而英國則用英式,計出答案一樣,但係老師可以因爲技巧唔同而話你錯;對於account新手(e.g. 本人),foundation嘅Account唔算太難,因爲都係學最基礎嘅知識。如果你喺香港數底唔差又係英文教,恭喜你,基本上上課係易如反掌,數學主要學algebra,statistics同understanding mathematical terms and techniques。AES一般都係同你做吓閲讀理解,listening,寫吓文,簡單而言即係聽説讀寫。PRS同IES有少少相似,都係要做做資料收集,問卷調查,寫結論,改善方法等等。Tutorial其實係同自己班嘅班主任傾下計,佢會問吓你學習上面有咩難題或者有咩不安之類。 3. Foundation係點揀科㗎? 一般foundation會喺入學前會需要你揀住一個year 1嘅major先,但係嗰個唔係真係最後你要讀嘅科,只係揀住先。而真正揀科就會係Term2嘅開頭就會有個揀科嘅講座,主要講吓有咩科可以揀,張揀科表點填,到大概完term2就會要你交張最後決定揀科表。張表上面你要揀3個選項,你要全部揀曬,大學會根據你揀嘅科目而比個conditional offer你,只要達標就可以順利升讀。大部分科目都係有guarantee offer,只有部分例如ACF(account and finance)就冇guarantee offer。 4. Foundation點上堂? 分組分時間上,好似我學校將同科嘅人分組,年年唔同,聽師兄師姐講佢地係分ABCDE組,我呢年係分123456組,一組大概20-25人左右。每個term都有唔同時間表,所以唔好大安旨意覺得第一個term全部下午堂,所以全年都係一樣。AES,PRS, tutorial呢三樣三個term必有之外,foundation中有啲課程會連續上2個term好似business foundation嘅Business Studies同埋Economics,而其餘一般都係上1個term。除此之外,連續上2個term嘅科目一般一個禮拜都會有一堂lecture,會幾組一齊上。 5. Foundation點考試? 一般都係星期六喺lecture hall到考,無錯,係星期六。你要帶你嘅學生證同埋文具去考試。袋、電子儀器一律唔可以入個lecture hall,仲要唔可以着有帽或者有口袋嘅外套入去。AES都係考Listening同 Reading & Writing。Listening分2個部分,第1個部分就係同IELTS 嘅好似,錄音會播放2次,都係聽到咩寫咩。第2部分就係lecture talk,佢會俾你聽2次,第一次播嘅時候,你要將覺得重要嘅資訊mark低,因爲佢冇俾到題目你。聽完第一次之後,佢先會俾個題目你,俾10分鐘你,將寫低咗嘅資訊答落題目到,10分鐘之後就會再聽多一次,最後俾30分鐘你整理答案。Reading & Writing 呢兩份卷係一齊考,Reading考110分鐘,頭10分鐘只係俾article你睇,過咗10分鐘之後就會派題目,題目同article都係分2部分:article A同B,接下嚟你有1小時作答時間。作答完畢,就係到writing嘅部分啦。監考老師暫時唔會收你嘅passage,因爲writing嘅部分需要你參考article去作答,都係會有2題題目,2題都係同2篇article有關。Maths同Account都係有3個鐘頭比你去做題目,而Business第一個term就係答有關你自己business project嘅posters嘅問題,第二個term就係限時寫essay,因爲疫情關係,我第二個term同埋economic所有考試全部都變曬coursework,簡單而言即係全部考試改曬寫essay。 6. Foundation嘅同學係咩人?會唔會有local? Foundation一般係俾international students讀。換句話,即係英國以外嘅所有學生。以我組為例子,有我一個香港人,一個澳門人,兩個印度人,一個玻利維亞人之外,全部都係内地人,隔離組則有台灣人,印尼人,沙地亞拉伯人,杜拜人,日本人等等。年紀方面,基本上同學都係同自己差唔多歲數,不過,我有個同學大我10年。 7. 如果Foundation成績唔達標可以點? Foundation一般都希望學生可以順順利利升到大學。萬一你真係唔達標,可以選擇俾錢重考,重考完個成績都係唔達標,可以選擇要求比較低嘅科。如果真係差到連要求低嘅科都達標唔到,可以選擇重讀或者去排名比較低嘅大學。一般呢種情況,foundation辦學機構都會幫你做。 8. 作爲中五嘅你,考慮緊完成中五就去讀定係考完DSE先讀? 如果你DSE冇信心考得好,而想去外國讀書或者已經知道自己目標係咩的話,家庭經濟能力許可下,我會建議你選擇去讀foundation。可以提早適應外國生活之外,仲可以提高入讀大學嘅機會。 其實去讀Foundation係一個好大嘅決定,因爲你除咗放棄你考DSE之外,仲係放棄埋你中學畢業證書,如果唔順利大學畢業唔到,你嘅學歷只得foundation或者中五,所以要慎重考慮,唔好因爲唔想考DSE而去讀。 我身邊嘅朋友一般都係同我一樣讀Business Foundation之外,大部分都係Social Studies,而我眼見比較多人選擇都係呢兩樣,如果你係想讀其他科嘅,不妨去下睇吓有咩堂要上。

UK Business & Management Foundation 英國大學基礎課程 | 常見問題 | 讀啲咩?保證可以升上英國大學?